besan ki saondhi roti par khatti chatani jaisi maa,
yaad aati hai chaonka baasan, chimtaa fukani jaisi maa,
chidiyon ki chahkaar mein gunje radhemohan ali ali
murge ki awaaz se khulte ghar ki kunde jaisi maa,
baan ki khurri khaat ke upar har aahat par kaan dhare
aadhi soyi aadhi jaagi bhari dupahari jaisi maa,
biwi, beti, bahan, padosan thodi thodi si sab mein
din bhar ik rassi ke upar chalati natani jaisi maa,
baant ke apna chehra, matha, ankhen jaane kahan gai
fate purane ik album mein chanchal ladaki jaisi maa....
